PFL və Topazdan jurnalistlər üçün stimul

Premyer Liqanın sponsoru olan Topaz Peşəkar Futbol Liqası ilə birlikdə əvvəlki çempionatlarda olduğu kimi, bu mövsüm də jurnalistlərin bölgələrə səfərini təşkil edir. Futbolxeber.az saytının məlumatına görə, bu mövsüm ilk belə səfər bu gün Gəncəyə təşkil edilib. 15-dan artıq media nümayəndəsi PFL-in əməkdaşları ilə birgə Nizami Yurduna yollanıblar.

Səfər zaman PFL-in mətbuat xidmətinin rəhbəri Aslan Şahgəldiyev jurnalistləri sevindirəcək xəbər verib. Şahgəldiyevin sözlərinə görə, media nümayəndələrinin Topaz Premyer Liqasına olan marağını artırmaq üçün hər səfərə əlavə 500 manat ayrılıb. Bu məbləğ səfər zamanı ən yaxşı işləyən mətbuat nümayəndəsinə veriləcək. Qalibi PFL-in mətbuat xidməti və Media Komitəsi birgə müəyyənləşdirəcək. Qalibin sayı 1-dən artıq olarsa, bu zaman məbləğ qaliblər arasında bölüşdürüləcək.