Samir Abasov: “Uduzan komandada həmişə səhv axtarırlar”

“Bu gün oyunumuz alınmadı. Futboldu, belə hallar olur. Hələ ki mövsüm yeni başlayıb. “Qarabağ”ı təbrik edirəm”. Futbolxeber.az saytının məlumatına görə, bu sözləri “Sumqayıt”ın baş məşqçisi Samir Abbasov “CBC-Sport”a açıqlamasında deyib.

Topaz Premyer Liqasının II turunda “Sumqayıt” “Qarabağ”a 0:2 hesabı ilə uduzub. Abbasov yenilgini belə şərh edib: “Göstərilən oyundan narazıyam. Görüləsi işlərimiz çoxdur. Yeni gələn oyunçulardan bəziləri bizə gec qoşuldular. Heyətdə gənclərin sayı çoxdu. Tam 100 faiz hazır olmayanları meydana buraxmağa məcburuq. Zamanla futbolçuların hamısı formaya düşəcək. Məğlubiyyəti taktika ilə bağlamazdım. Uduzan komandada həmişə səhv axtarırlar. Bu sistemlə biz “Zirə”ni udmuşduq”.