Qriqorçuk: “Aqressivlik çatmadı”

Topaz Premyer Liqasının XVI turu “Neftçi” üçün uğurlu alınıb. Əsgər Abdullayevin rəhbərlik etdiyi paytaxt klubu səfərdə “Qəbələ”ni 1-0 hesabı ilə üstələyib. Futbolxeber.az-ın məlumatına görə, görüşdən sonra baş məşqçilər qarşılaşma haqda bunları deyiblər:  

Roman Qriqorçuk (“Qəbələ”nin baş məşqçisi): “Rəqibi qələbə münasibəti ilə təbrik edirəm. “Neftçi” layiq olduğu qələbəni qazandı. Futbolçularım hücuma keçmək istəyirdilər, amma nəsə alınmırdı. Komanda ikinci dövrədə cəmi 1 qələbə qazanıb, bunu bilirəm. Biz yaxşı futbol sərgiləsək də, nəticə qazana bilmirik. Öncəki turlarda qol vura bilməsək də, aqressiv idi. Amma bu oyun belə deyildi, aqressivlik çatmadı”.

Əsgər Abdullayev (“Neftçi”nin baş məşqçisi): “İki fərqli hissə izlədik. İlk hissədə daha yaxşı futbol oynadıq. Fasilədən sonra düşündük ki, rəqibi əks hücumda tutaq. Amma düşündüklərimizi yerinə yetirə bilmədik.  Buna rəğmən,  qələbə hesabını qoruyub saxlaya bildik.

Komandada qalıb-qalmayacağımla bağlı sual 1 aydır ki, davam edir. Bu sual çeynənmiş saqqız kimidir. Bilirdim ki, yenə bu sual olacaq. Hər şey Allahın qismətidir. Filyonun əsas heyətdə meydançaya çıxması təsadüfi deyildi. Son məşqlərdə onu daha “diri” gördüm. Başla yaxşı oynamağı bacaran futbolçunu start heyətində meydançaya buraxdım və sevindirici haldır ki, yanılmadım. Zədəli oyunçularımız var. Elşən Abdullayev əməliyyat olunub, Araz Abdullayev isə zədədən yeni qayıdıb. Futbolçular formaya düşdükdən sonra heyətdə rəqabət artacaq. İndiki vəziyyətdə futbolçular özlərinə inanmalıdırlar”.