"İnter": əvvəl Türkiyə, sonra Sloveniya

Azərbaycan Premyer Liqası başa çatdıqdan sonra “İnter” komandasına iyun ayının 2-dək istirahət veriləcək. Futbolxeber.az-ın məlumatına görə, həmin gün komanda üzvləri Türkiyənin İzmit şəhərinin yaxınlığındakı Kartepe qəsəbəsində bir araya gələcəklər. 9 gün davam edəcək təlim-məşq toplanışı iyunun 11-də başa çatacaq. Türkiyə toplanışı çərçivəsində komandanın iki yoldaşlıq oyunu keçirəcəyi planlaşdırılır. “İnter” toplanış zamanı həmçinin ikitərəfli matçlar da keçirəcək.

Komanda hazırlıq prosesinin ikinci mərhələsini Sloveniyada keçirməyi nəzərdə tutur. İyun ayının 14-27-dək davam edəcək toplanış çərçivəsində “İnter” beş yoxlama qarşılaşması keçirəcək. Rəqiblərin adları hələlik məlum deyil.

Əlavə edək ki, toplanışın sonunda komandanın vətənə qayıdıb-qayıtmayacağı Avropa Liqasında aparılacaq püşkatmanın nəticəsindən asılı olacaq.