"Rəvan" "Xəzər Lənkəran"la oyuna hazırlaşır

"Rəvan” Premyer Liqanın cari mövsümündə sonuncu matçını Lənkəranda keçirəcək. Futbolxeber.az-ın məlumatına görə, komanda 32-ci turun oyunu üçün hazırlıqlarını davam etdirir. Artıq futbolçular "Xəzər Lənkəran”la səfər matçı öncəsi Bakıda son məşqə də çıxdı.

 

"Bayıl Arena”da baş tutan səhər məşqində futbolçular isinmə hərəkətlərindən sonra fiziki hazırlıq üzərində çalışdı. Məşqin əsas hissəsi isə taktiki-texniki hazırlığa və toplu çalışmalara həsr edildi. Dar sahədə ani ötürmələr, pressinq altında topu özündə saxlama və qapıya zərbələr üzərində çalışdıqdan sonra futbolçular yarı meydanda ikitərəfli oyunda qüvvələrini sınadılar.

 

Qeyd edək ki, komanda sabah səhər oyunun keçiriləcəyi məkana - Lənkərana yola düşəcək. Səfər zamanı cəzalı durumda olan Nikolay Orlovski ilə Şəhriyar Rəhimov, o cümlədən zədə üzündən mövsümü erkən qapayan Tural Axundov komanda ilə birgə olmayacaq. Onların əvəzində əvəzedicilərdən Anar Həsənov, Cəmil Rəhimli və Əli Əliyev əsas komandaya cəlb olunub.