Zidan da “Lester”lə qarşılaşmaq istəmir

“Real”ın baş məşqçisi Zinəddin Zidan Çempionlar Liqasının 1/4 final mərhələsinin püşkatması öncəsi fikirlərini açıqlayıb.

Futbolxeber.az saytının məlumatına görə, fransız mütəxəssis qeyd edib ki, yarımfinala gedən yolda “Lester”lə qarşılaşmaq istəmir:

“Düşünmürəm ki, hansısa məşqçi “Lester”ə rəqib olmağa ümid etsin. Bu komanda heç kimin inanmadığını edir. “Lester”in İngiltərədə çempion olacağına da, cavab oyununda “Sevilya”nı mübarizədən kənarlaşdıracağına da ümid edənlərin sayı çox az idi. Amma onlar qarşıya qoyulan hədəfə çatdılar.

1/4 finaldakı rəqibin kimliyindən asılı olmayaraq, “Lester” cütün favoriti olmayacaq. Amma rəqibdən fərqli olaraq, onların üzərində təzyiq olmayacaq. Odur ki, 1/4 finalda da “Lester”dən çox şey gözləmək olar.

Komandanın heyətində bacarıqlı futbolçular var. Ən əsası isə meydana çıxan hər bir oyunçu ürəkdən mübarizə aparır”.

Qeyd edək ki, daha əvvəl “Yuventus”un qapıçısı Canluici Buffon da 1/4 finalda “Lester”lə qarşılaşmaq istəmədiyini açıqlamışdı.