Oktavio Manteka: “Biz bu gün finalın ilk matçını qazandıq”

“Bu gün bizim üçün qələbə qazanmaq çox vacib idi. Çünki artıq çempionatda son dövrə start götürüb”.

Futbolxeber.az saytına müsahibəsində bu sözləri “Sumqayıt”ın yarımmüdafiəçisi Oktavio Manteka Azərbaycan Premyer Liqasının 28-ci turunda “Araz-Naxçıvan” üzərində qazanılan 1:0 hesablı qələbəni şərh edərkən deyib.

İspan futbolçu bildirib ki, son dövrədəki hər oyun finala bərabərdir: “Mövsümün sonuna az qalıb. Çempionatın həlledici anıdır. Bu mərhələdəki 9 qarşılaşmanın hər biri finala bərabərdir. Biz bu gün finalın ilk matçını qazandıq. Əlimizdən gələni etməliyik ki, növbəti matçlarda da 3 xal qazanaq”.  

O, növbəti turdakı görüşdən də söz açıb: “Növbəti matç “Neftçi”yə qarşıdır. Çox vacib bir oyun olacaq. Digər nəticələrdən asılı olaraq qələbə qazanmaqla ikinci pilləyə də yüksələ bilərik. Odur ki, səfərə 3 xal üçün yollanacağıq”.

“Araz-Naxçıvan”la görüşdə mövsümdə dördüncü sarı vərəqəsini alan Oktavio Manteka cəzalı duruma düşüb: “Təəssüf ki, dördüncü sarı vərəqəmi aldım. “Neftçi” ilə görüşdə komandama kömək edə bilməyəcəm və bu, mənim üçün çox təəssüfləndirici məqamdır. Mənimlə yanaşı, Morata da cəza səbəbindən növbəti görüşü kənardan izləmək məcburiyyətindədir. İnanıram ki, digər futbolçularımız bizim yoxluğumuzu unutduracaqlar”.

31 yaşlı oyunçu “Sumqayıt”ın avrokuboklar şansını belə dəyərləndirib: “Hər oyundan sonra növbəti matçı düşünürük. Bacardığımız qədər çox xal toplamalıyıq. “Neftçi” ilə görüş qitə kuboklarına yollanmaq baxımından mühüm əhəmiyyət kəsb edəcək. Necə deyərlər, 6 xallıq oyun olacaq”.

Fərəc ASLANOV