Portuqaliyadan milli komandamıza sərf edən qələbə

21 yaşadək futbolçulardan ibarət milli komandalar arasında Avropa çempionatının seçmə mərhələsi çərçivəsində yığmamızın yer aldığı 8-ci qrupda bir oyun baş tutub. Futbolxeber.az-ın məlumatına görə, qrup lideri Portuqaliya öz meydanında Makedoniyanı sınağa çəkib. Matç meydan sahiblərinin 2:0 hesablı qələbəsi ilə yekunlaşıb.

Bununla da Portuqaliya millisi beşinci oyununda beşinci qələbəsini qazanaraq, xallarının sayını 15-ə çatdırıb. Portuqaliyanın qələbəsi millimiz üçün də sərfəlidir. Çünki səfərdən xalsız qayıtdığına görə Makedoniya millisi yenə də 4 xalla Azərbaycan yığması ilə birgə qrupda 4-5-ci yerləri bölüşdürür.

Qeyd edək ki, ikinci pillədə qərarlaşan İsrailin 9, üçüncü yerdə olan Norveçin isə 6 xalı var. Lakin skandinaviyalılar digər 4 komanda ilə müqayisədə 1 oyun artıq keçirib.