"Rəvan" yoxlama oyunu keçirəcək

Azərbaycan Premyer Liqasının 13-cü turu çərçivəsində "Sumqayıt”la qarşılaşdıqdan sonra "Rəvan"ın üzvlərinə 4 günlük istirahət verilib. Futbolxeber.az-ın məlumatına görə, baş məşqçi Şahin Diniyevin qərarına və planına əsasən, komanda ayın 13-də bir araya gələcək.

Məşqləri bərpa etdikdən sonra isə futbolçular ardıcıl 4 gün Mərdəkandakı "Dalğa Arena”da çalışacaq. Məşqlər gündə 2 dəfə olmaqla keçiriləcək. Səhərlər baş tutacaq hazırlıq prosesi fiziki, axşam məşqləri isə taktiki-texniki yöndə olacaq.

"Rəvan" milli komandaların oyunları ilə əlaqədar olaraq yaranmış fasilədən maksimum istifadə edərək yoldaşlıq görüşü də keçirmək niyyətindədir. Oyun noyabrın 17-nə planlaşdırır. Amma hələ sınaqçı-rəqibin kimliyinə aydınlıq gəlməyib. Noyabrın 19-dan etibarən isə komanda sırf  "Qarabağ”la oyunun hazırlıqlarına başlayacaq. Qeyd edək ki, "Qarabağ” - "Rəvan” oyunu noyabrın 24-də keçiriləcək.