"Simurq" "Olimpiakos"la oyuna hazırdı

Yeni mövsümün hazırlıqlarını Avstriyada davam etdirən "Simurq" günü iki məşqlə tamamladı. Futbolxeber.az-ın məlumatına görə, səhər hazırlığında isinmə hərəkətlərindən sonra texniki təmrinlərə keçildi. Qısa ötürmələr və toplu çalışmalardan sonra futbolçular mövqelərinə görə bölünərək məşqçilər korpusunun müxtəlif tapşırıqlarını yerinə yetirdilər. Sonda isə ikitərəfli oyunla hazırlıq tamamlandı.

Axşam saatlarında keçirilən məşq isə xüsusən "Olimpiakos"la keçiriləcək yoldaşlıq görüşünə hazırlıq məqsədi daşıyırdı. Əvvəlcə baş məşqçi Georgi Çixradze yetirmələrini ətrafına yığaraq onlarla qısa söhbət elədi. Daha sonra futbolçular iki qrupa bölünərək həndbol oynadılar. Bundan sonra isə taktiki təmrinlər yerinə yetirildi. Qrup halında "kvadrat" oynadıqdan sonra isə cinahlardan hücumların təşkilinə keçildi. Cərimə meydançasına asmalar üzərində məşq edildi. Hazırlığın sonunda baş məşqçi Georgi Çixradzenin rəhbərliyi altında cərimə zərbələrindən müxtəlif ev tapşırıqları hazırlandı.

Hazırlığı klubun vitse-prezidenti Aydın Rizayevdə yaxından izləyirdi.