Toşak Maltada mətbuat önünə çıxacaq

İyun ayının 20-dən etibarən Almaniyanın Bad Göqqinq qəsəbəsində yay təlim məşq toplanışına start verən “Xəzər Lənkəran” bu gün hazırlığını səhər məşqi ilə tamamlayıb. Futbolxeber.az-ın məlumatına görə, komanda gecə saatlarında Almaniyanı tərk edərək UEFA Avropa Liqasının I təsnifat mərhələsinin “Slima” - “Xəzər Lənkəran” matçı ilə əlaqədar Bakı vaxtı ilə 08.50-də Münhen-Luqa aviareysi ilə Maltaya yola düşəcək. Luqa hava limanında 12.10-da (yerli vaxtla 08.10) olacaq “Xəzər Lənkəran” buradan yerləşəcəyi “The Palace Malta” otelinə gedərək istirahətə çəkiləcək. İyul ayının 1-də, matçın keçiriləcəyi saatda, yerli vaxtla saat 18.45-də “Xəzər Lənkəran” oyun öncəsi son məşqinə çıxacaq. Məşqdən yarım saat öncə isə baş məşqçi Con Bencamin Toşakın KİV nümayəndələri üçün mətbuat konfransı planlaşdırılır.