Giqqz: “Bakıda yüksək səviyyədə oynamaq lazım olduqda, bunu etdik”

Uels milli komandasının baş məşqçisi Rayan Giqqz AVRO-2020-nin seçmə mərhələsində komandasının çıxışını xatırlayıb.

Futbolxeber.az saytının xarici KİV-ə istinadən verdiyi məlumata görə, 47 yaşlı uelsli mütəxəssis yer aldıqları “E” qrupunda uğurlu çıxışa görə futbolçularını tərifləyərək rəqiblərindən olan Azərbaycan yığmasıyla Bakıda görüşü də yada salıb:

“Futbolçularım hər şeyə layiqdirlər. Çünki seçmə mərhələdə üzərlərinə düşəni yerinə yetirdilər. Yüksək səviyyədə oynamaq lazım olduqda bunu etdilər - səfərdə Azərbaycan və Slovakiyaya qarşı. Fiziki cəhətdən güclənmək və uğurlu nəticə qazanmaq lazım olduqda bunu bacardılar - evdə Xorvatiya və Macarıstana qarşı. Onlar bunu edəcəklərinə inandılar, nəticədə reallaşdırdılar”.

Xatırladaq ki, "Bakcell Arena"da millimizə 2:0 hesabıyla qalib gələn, final mərhələsinə vəsiqə qazanan uelslilər Türkiyə və İsveçrəylə ordakı qrup matçlarını Bakı Olimpiya Stadionunda keçirəcək.