"Bakı"ya qalib gələn məşqçi "Lokomotiv"də

Rusiyanın "Lokomotiv" klubunda baş məşqçi dəyişikliyi olub. Futbolxeber.az-ın məlumatına görə, ötən mövsüm böyük ümidlərlə komandaya gətirilən, lakin sonra uğursuzluqla üzləşən Slaven Biliç istefaya göndərilib. Bu haqda "dəmiryolçular"ın rəsmi saytı məlumat yayıb. Məlumatda qeyd olunur ki, bundan sonra komandanı Leonid Kuçuk çalışdıracaq. Klubun prezidenti Olqa Smorodskaya bu gün yeni çalışdırıcını komanda üzvlərinə təqdim edib.  

Qeyd edək ki, Kuçuç vaxtı ilə "Bakı"ya rəqib olub. Belə ki, 2007-ci ilin yanvarında Moskvada keçirilən "Birlik Kuboku"nda belaruslu mütəxəssisin rəhbərlik etdiyi "Şerif" qrup mərhələsində "Bakı"nı 4:3 hesabı ilə məğlub etmişdi.

Son mövsümdə isə Kuçuk Rusiyanın digər klubu "Kuban"ı çalışdırırdı. Komandanı tarixində ilk dəfə avrokuboklara daşıyan Kuçuk mövsüm başa çatdıqdan sonra klub rəhbərliyi ilə ortaq məxrəcə gələ bilmədiyindən yeni müqavilə imzalamaqdan imtina edib.