“Beşiktaş” - “Mersin İdmanyurdu” oyunu yarımçıq dayandırıldı

Türkiyə Superliqasının 18-ci turu çərçivəsində keçirilən “Beşiktaş” - “Mersin İdmanyurdu” oyunu yarımçıq dayandırılıb. Futbolxeber.az-ın məlumatına görə, güclü qar yağması buna səbəb olub. Oyun 6-cı dəqiqədə baş hakimi Mete Kalkavan tərəfindən dayandırılıb və futbolçular paltardəyişmə otağına yollanıb. Hakim bildirib ki, xətləri görmək mümkün deyil. Futbolçular isə referiyə “belə şəraitdə futbol oynamaq olmaz” deyiblər. 7 dəqiqə ərzində stadionun əməkdaşları qarı təmizləməyə çalışıblar. Lakin kapitanları yanına çağıran Kalkavan matçın təxirə salınması haqda qərar qəbul edib. Normal şərtlərdə 24 saat sonra oyun qaldığı yerdən davam etdirilməlidi. Lakin İstanbulda güclü qarın sabah da davam edəcəyi gözlənilir. Bu səbəbdən də qarşılaşma başqa vaxta keçiriləcək.