Yuri Syomin: “Əsas odur ki, komandam ölkə çempionluğuna iddia edir” (Müsahibə)

 “Qəbələ”nin baş məşqçisi Yuri Syomin “Sportbox.ru” saytına müsahibə verib. Futbolxeber.az-ın məlumatına görə, təcrübəli mütəxəssis əsasən ölkəsində geridə qalan ən mühüm futbol olaylarını xatırlayıb və ilin ən yaxşılarının adlarını açıqlayıb. Həmin müsahibəni kiçik ixtisarlarla təqdim edirik:

- 2013-cü ilin hansı futbol hadisəsi sizin üçün daha yaddaqalan oldu?

- Yəqin ki, Rusiya millisinin dünya çempionatına vəsiqə qazanmasını qeyd etsəm, yenilik etmiş olmaram.

- Rusiyada ilin futbolçusu?

- Yekdilliklə, Qluşakov

- Sizin üçün ilin kəşfi kim oldu?

- Elə o. Məhz Qluşakovu ilin kəşfi hesab edirəm.

- İlin komandası?

- “Lokomotiv”, hansı ki payız mərhələsində stabil çıxış etdi.

- Məşqçi?

- Valeri Karpin.

- Futbol məyusluğu?

- Öz komandalarını sevməyən azarkeşlərin davranışları.

- 2013-cü ildə özünüz üçün nəyi ən böyük uğur hesab edirsiniz?

- Əsas odur ki, mənim komandam ölkə çempionluğuna iddia edir.

- Messi, Riberi, yoxsa Kriştianu Ronaldo?

- Kriştianu Ronaldo.

- 2014-cü ildə Rusiya futbolu ilk növbədə nədən qaçmalıdır?

- İlk növbədə infrastrukturu yüksəltmək və meydançaları yaxşı vəziyyətə gətirmək lazımdı. Məhz bərbad meydançalar yüksəksəviyyəli futbolçulara öz oyunlarını sərgiləməyə imkan vermir.

- Sizin fikrinizcə, Rusiya futbolunda kim daha çox Şaxta Baba obrazına uyğun gəlir?

- Bağışlayın, amma futbol adamlarından heç birini mən bu obraza oxşada bilmirəm.