Arif Əsədov: “İlk qələbənin ardından "Qəbələ" relsə düşəcək”

“3-cü turu dəyərləndirəndə maraqlı start izlədiyimizi deyə bilərik. Gözlənilməz nəticələr olur”.

Futbolxeber.az saytına müsahibəsində bu sözləri milli komandamızın məşqçisi Arif Əsədov Azərbaycan Premyer Liqasında III turun oyunlarını dəyərləndirərkən deyib.

O, çempionatın maraqlı start götürdüyünü bildirib: “3 turdan sonra turnir cədvəlində də gözlənilməz mövqelər var. Bu baxımdan çempionatımız maraqlı keçir. Hər bir komanda inamlı mübarizə aparır. Onları güclü və zəif kimi hələ ki bölmək olmaz”.

Təcrübəli mütəxəssis "Qarabağ"ın debütant “Araz-Naxçıvan” üzərində çətin qələbə qazandığını vurğulayıb: “Dediyim kimi, komandaların hər biri sürpriz etməyə qadirdir. Hətta bunu dünən "Araz-Naxçıvan"ın timsalında görə bilərdik. Son anda "Qarabağ" xal itkisindən xilas olmağı bacardı. İlk turlarda belə hallar olur. Burada illərin təcrübəsi də öz sözünü dedi. "Qarabağ" hazırda iki cəhbədə döyüşür. Bu səbəbdən komanda xal itirə bilər. Rəqiblər də bundan laziminca istifadə etməyə çalışırlar. "Araz-Naxçıvan" buna çox yaxın olsa da, sonda ustalıq öz sözünü dedi”.

A.Əsədov “Qəbələ”nin mövsümə uğursuz start verməsinə də toxunub: “Gözlənilməz sürprizlərdən biri də "Qəbələ"nin xal toplamamasıdır. Düşünürəm ki, komandanın yayda çoxlu futbolçu itirməsi, heyətdəki dəyişikliklər, transfer olunan futbolçular adaptasiya ola bilməməsi əsas səbəblərdəndir. Komandaya gələnlər gedən aparıcı futbolçuların yerini doldura bilmir. İlk qələbənin ardından "Qəbələ" relsə düşəcək”.

Azad NURİYEV