Şahin Diniyev: “Kəpəz”lə oyun təhlükəli idi”

“Altı gündü məşq edirik, ümumiyyətlə, heç taktika üzərində işləməmişik. Sadəcə, hazırlığın birinci tsikli nəfəs borularının açılması, ağciyər sisteminin düzəlməsi idi. İkincisi, gücə işləmək, güc yığmaq idi. Üçüncü də topa hissiyyatı artırmaq istəyirdik. Bu yöndə heç bir oyun epizodları fikirləşməmişdik”.

Futbolxeber.az saytına müsahibəsində bu sözləri “Səbail”in baş məşqçisi Şahin Diniyev deyib.

“Kəpəz”ə qarşı keçirilən yoxlama matçı (2:1) barədə danışan mütəxəssis komandada baxışda olan bəzi gənclərin səhvə yol verdiklərini bildirib: “Komanda ümumiyyətlə, hazır deyil. Bu baxımdan “Kəpəz”lə oyun təhlükəli idi. Nəinki 90 dəqiqə, hətta 60 dəqiqənin özü təhlükəli idi. Bütün futbolçulara imkan verdik, oynadılar. Çoxu 60 dəqiqə oynadı. Baxışa gələn 3 gənc futbolçu də meydanda oldu, əvəzedicimizdən də 3 nəfər var idi. Səhv edən də onlar oldu. Lakin eybi yoxdu, bu cür matçda nəticə elə də önəmli deyil”.

Diniyev baxışda olan gənclərlə bağlı artıq qərarını verib: “O futbolçular hələ Premyer Liqaya hazır deyillər. Çalışacağıq ki, I Divizionda hasısa komandalarda olsunlar, çünki "bişməlidirlər". Bir il oynamalıdırlar, amma nəzarətimiz altında olacaqlar.  Çünki potensiallı futbolçulardı, gəncdilər. Birdən-birə riskə atmaq istəmirik. Məşqlərimizə 6-7 futbolçu gəlmişdi, 3-nü saxladıq baxmağa”.

FƏRƏC