Şahin Diniyev: "Qəbələ"yə qarşı oynamaq mənim üçün xoşdur"

"Sürətli, qarşılıqlı hücumlar şəraitində keçən bir oyun oldu. Azarkeşlər üçün maraqlı, bol qollu matç keçdi. Hər iki komanda qələbə qazanmaq istəyirdi. Biz sonuncu yerdəyik, onlar ön sıralarda. "Qəbələ"yə qarşı belə futbol oynamaq mənim üçün xoşdur. Komanda hər həftə daha yaxşı futbol oynamağa çalışır. Hər iki komanda qələbəyə layiq idi. Biz üç xala yaxın idik. Asan qollar buraxmağımız məni narahat edir. Bunu yavaş-yavaş düzəltməliyik".

Futbolxeber.az saytının məlumatına görə, bu sözləri "Səbail"in baş məşqisi Şahin Diniyev Azərbaycan Premyer Liqasının 24-cü turunda "Qəbələ" ilə 2:2 hesablı heç-heçə etdikləri oyundan sonra keçirilən mətbuat konfransında deyib.

"Komandanın olduğu yer bizi sıxır, futbolçular təzyiq altındadırlar. Nə qədər motivasiya versək də, oyunçular turnir cədvəlinə baxanda sıxılırlar. Uduzmaq qorxusu hələ ki, onların içindən çıxmayıb. Artıq itirəcəyimiz bir şey qalmayanda özünəinam qayıtdı. Əvvəl çəkinə-çəkinə oynayırdıq. Məşqçi olaraq mənim də üzərimdə təzyiq var" - deyə o bildirib.