Qurban Qurbanov: "İlk növbədə qol vurmağa çalışacağıq"

Sabah Avroliqanın III təsnifat mərhələsi çərçivəsində "Gefle" ilə qarşılaşacaq "Qarabağ"ın baş məşqçisi Qurban Qurbanov bu gün oyunöncəsi mətbuat konfransı keçirib. Futbolxeber.az-ın məlumatına görə, Q.Qurbanov qələbə qazanmağa çalışacaqlarını bildirib: "Rəqib son vaxtlar öz oyun üslubunu qurub. Baxmayaraq ki, bir neçə həftə bundan qabaq çempionatda uğurlu çıxış etməyiblər. Ancaq son oyunlarda onların necə komanda olduğunu gördük. “Gefle” bir neçə sistemdə oynaya bilir. Bildiyimiz hər 3 oyun üslubundan istifadə etməyi bacarırlar. Həm səfərdə, həm də öz meydanlarında yaxşı çıxış edirlər. Biz də onların oyun sisteminə uyğun hazırlaşmışıq. Ancaq rəqiblə oyuna çıxmamış onları yaxşı tanıya bilmərik. Onu bilirik ki, qol vurmağı bacaran komandadır. Çox ucaboy futbolçuları olduğu üçün ehtiyatlı olmalıyıq. İlk oyunda azarkeşlərimizin önündə qələbə qazanmağa çalışacağıq".

Təcrübəli mütəxəssis heyətdəki itkilərdən də söz açıb: "Heyətimizdə problem də var. Vüqar Nadirov zədə səbəbindən oynamayacaq. Reynaldo və Maksim də zədəlidir. Buna baxmayaraq yaxşı nəticə qazanmağa çalışağıq. Əsasən qol buraxmamağa çalışacağıq. Ancaq ilk növbədə qol vurmağa çalışacağıq".