Mirhüseyn Seyidov: “Rəhbərlik deyib ki, sentyabra qədər...”

“Qarabağ”ın əsas heyətlə meydana çıxmayacağını bilirdik. Amma yenə də oyunun çətin keçəcəyi gözlənilirdi. Çünki meydana çıxanlar özlərini yaxşı tərəfdən göstərmək istəyirdilər. Bizdə isə transfer qadağası var. Heyətimizə yeni oyunçu qata bilmirik”.

Futbolxeber.az saytına müsahibəsində bu sözləri “İnter”in yarımmüdafiəçisi Mirhüseyn Seyidov Topaz Premyer Liqasının ikinci turunda “Qarabağ”a 0:1 hesabı ilə uduzduqları oyun barədə danışarkən deyib.

Təcrübəli yarımmüdafiəçi yenilgi haqda bunları söyləyib: “Meydanda komanda əlindən gələni etdi. Ən azı 1 xal qazanmaq istəyirdik. Lakin sonda buraxdığımız qol məğlubiyyətə səbəb oldu. Xal qazanmaq qismət olmadı. Artıq növbəti turu düşünməliyik. Gələn tur “Səbail”lə matçda sərfəli nəticə qazanmağa çalışacağıq”.

M. Seyidov vurğulayıb ki, heyətdəki problemlərə baxmayaraq, qışa qədər tam gücləri ilə mübarizə aparacaqlar: “Nə gücümüz var, meydanda qoyuruq. Qışa qədər belə mübarizə aparmalıyıq. Əlimizdən gələni də edəcəyik. Komandada ab-hava normaldı”.

“İnter”in yarımmüdaiəçisi komandanın maliyyə durumuna da toxunub: “Avroliqadan sonra komandada ruh düşkünlüyü var idi. Çempionat başlayandan çalışırıq özümüzə gələk. İyun ayının maaşını almışıq. Yəqin ki, qarşıdakı günlərdə iyulun da pulu verilər. Rəhbərlik deyib ki, sentyabrda qədər hər şey qaydasına düşəcək”.