Elxan Abdullayev: “Azarkeşlər “istefa” şüarını səsləndirməkdə haqlıdırlar”

Topaz Premyer Liqasının ikinci turunda “Səbail”in qonağı olan “Neftçi” 0:1 hesabı ilə uduzub. Futbolxeber.az saytının məlumatına görə, E. Abdullayev görüşlə bağlı bunları deyib:

“Belə oyundan sonra danışmaq çətindi. Uduzmalı oyun deyildi. Təəssüflər olsun ki, bu stadionda keçən il AZAL-la oyunda olduğu kimi yenə də sonda qol buraxdıq. Komanda qol vurmağı çox istəyirdi. Buna görə də sonda konsentrasiya itdi. “Səbail” yaxşı komandadı. Çox rəqibdən xal alacaqlar. Bu gün bizə də istədiyimiz oyunu göstərməyə imkan vermədilər”.

- Razısız ki, bu gün “Neftçi” qələbəyə layiq deyildi?

- Epizodlarımız var idi. Amma ustalıq çatışmadı. Rəhman təkbətək qaldığı epizodda hesabı açsaydı, nəticə tam fərqli olardı.

- İkinci turda istefa şüarını eşitmək sizə nə dərəcədə təsir edir?

- Heç kim istəməz ki, istefa şüarını eşitsin. Mənim yerimdə olsaydız, sizə də pis təsir edərdi. Azarkeşlər haqlıdılar. Onları başa düşürəm və qəbul edirəm.

- “Neftçi”nin problemi nədədir?

- Yalnız psixologiyada. “Neftçi”nin oyunçuları bu gün “Səbail”in futbolçularından üstündülər. Amma meydanda xarakter, psixologiya öz sözünü deyir. Yəqin ki, fərdi olaraq düzgün hazırlıq aparmırıq.