Fakundo Pereyra: “Sabah PAOK-a qol vursam...”

“Qəbələ”nin hücumçusu Fakundo Pereyra Futbolxeber.az saytına müsahibə verib.

- Sabah Avroliqanın ilk turu çərçivəsində “Qəbələ” öz meydanında PAOK-u qəbul edəcək. Qarşılaşma haqda nə deyə bilərsən?

- Biz qarşıda çətin oyun gözləyir. Çox önəmli bir görüşdür. Çalışmalıyıq ki, yaxşı mübarizə aparaq. Qalib gəlməyi çox istəyirik. Əsas odur ki, qələbə ilə başlayaq.

- Hazırda “Qəbələ”nin formasını geysən də, müqavilə ilə PAOK-a məxsussan. Görüşdən öncə hansı hisslər keçirirsən?

- 1 aydır ki, “Qəbələ”nin düşərgəsindəyəm. Hazırda bu klubun formasını geyinirəm. Belə məqamda məni yalnız “Qəbələ”nin uğurları maraqlandırır. Sabah da komandamın qələbəsi üçün əlimdən gələni edəcəyəm.

- Mətbuatda yayılan xəbərlərə görə, PAOK-dan baş məşqçi İqor Tudora görə ayrılmısan. Bu məqam sabah meydana xüsusi motivasiya ilə çıxmağına səbəb ola bilər?

- Baş məşqçi ilə aramda problem yoxdur. Sadəcə onun bir qərarı ilə razılaşmadım. Bu səbəbdən də hazırda “Qəbələ”nin futbolçusuyam.

- Sabah PAOK-a qol vursan, bunu xüsusi şəkildə qeyd edəcəksən?

- Yox. PAOK-a qol vursam, bunu xüsusi şəkildə qeyd etməyəcəm. Çünki orada olduğum müddətdə məni daim yaxşı insanlar əhatə edib. Özümə qarşı gözəl münasibət görmüşəm.

- PAOK-un baş məşqçisi İqor Tudor oyunöncəsi mətbuat konfransında “Mən Fereyraya sabahkı matçdan başqa, “Qəbələ”dəki bütün görüşlərində uğurlar arzu edirəm”. Sən ona nə arzu edirsən?

- Mən də ona uğurlar arzu edirəm.

- 2 klub arasındakı razılığa əsasən sən PAOK-la səfər matçında meydana çıxa bilmərsən. Bu qərara münasibətin necədir?

- Hazırda yalnız sabahkı matçı düşünürəm. Əsas odur ki, sabah meydana çıxım. Bu oyunu başa vuraq, gələcək barədə sonra danışarıq.