Vəkil: “Cavid Hüseynov ev dustağı edilə bilər”

“Məhkəmənin qərarı dəyişdirilmədən qüvvədə saxlanıldı. Hüquqlarını müdafiə etdiyim Cavid Hüseynovun appelyasiya şikayəti təmin olunmadı. 3 ay həbs qərarı qüvvədə qaldı”. Futbolxeber.az saytına açıqlamasında bu sözləri vəkil Adəm Məmmədov deyib.

Bu gün Apellyasiya Məhkəməsində futbolçu Cavid Hüseynovun barəsində seçilmiş həbs qəti imkan-tədbirinin dəyişdirilməsi ilə bağlı verdiyi apellyasiya şikayəti təmin edilməyib. 3 aylıq həbs qərarı qüvvədə saxlanılıb.

Şikayətləri təmin olunmasa da, Adəm Məmmədov yenidən məhkəməyə üz tutacaqlarını bildirib: “2-3 gün ərzində tərəfimizdən Cavid Hüseynovun ev dustaqlığına çıxarılması barədə müraciət olacaq. Bu məsələyə Səbail Rayon Məhkəməsində baxılacaq. Proses gələn həftə baş tutacaq. Cavidin himayəsində 2 azyaşlı uşaq var. Ailə vəziyyətinə görə, müraciətimizin qəbul olunacağına inanıram”.