“Qarabağ”ın çempionluq bayramı ləğv olundu

Azərbaycan Premyer Liqasının 35-ci turunun sabah keçiriləcək “İnter” - “Qarabağ” oyunundan sonra əvvəlcədən nəzərdə tutulan atəşfəşanlıq ləğv edilib. Futbolxeber.az-ın məlumatına görə, bu haqda qol.az saytına Peşəkar Futbol Liqasının (PFL) prezidenti Ramin Musayev məlumat verib.

O, Bakıda 15 nəfərin faciəli ölümü səbəb olan çoxmərtəbəli binadakı yanğına görə belə qərar verdiklərini bildirib.

PFL prezidenti deyib ki, matçdan sonra 2014/15 mövsümü Azərbaycan Premyer Liqasının qalibi olan “Qarabağ”a yalnız çempionluq kuboku və qızıl medal, “İnter”ə isə gümüş medal təqdim olunacaq. Bu zaman hər hansı bayram tədbiri, atəşfəşanlıq olmayacaq.

Matçdan əvvəl faciə qurbanlarının xatirəsi bir dəqiqəlik sükutla yad olunacaq.

Qeyd edək ki, “İnter” - “Qarabağ” oyunu sabah saat 20.00-da “İnter Arena”da başlanacaq.