Rəşad Sadıqov: “Çempion olduq, əlimizdən gələni də edəcəyik ki, kuboku da qazanaq”

“Qəbələdəki oyuna baxırdım. “Qəbələ”yə təşəkkür edirəm ki, “İnter”lə heç-heçə oynadılar. “İnter” bu gün də qələbə qazansaydı, növbəti oyunumuz çox çətin olacaqdı”. Futbolxeber.az-ın məlumatına görə, bu sözləri “Qarabağ”ın kapitanı Rəşad Sadıqov deyib.

Ağdam klubunun ardıcıl ikinci il qazandığı çempionluğu şərh edən təcrübəli futbolçu, çempionluğun çətin alındığını vurğulayıb: “Bu mövsüm çempionluq daha çətin alındı. İndi bunun ardını gətirməliyik. Ardıcıl ikinci il çempion olduq. Bu münasibətlə klub rəhbərliyini, məşqçilər korpusunu, komanda yoldaşlarımı, azarkeşlərimizi təbrik edirəm”.

Rəşad Sadıqov son turlarda “İnter”lə xal fərqlərinin azalması haqda da danışıb: “Əvvəl xal fərqi daha çox idi. Son turlarda “İnter” yaxşı çıxış edirdi. Bunun da nəticəsində xal fərqini azaltdılar. Növbəti oyunda onlarla üz-üzə gələcəyik. İstəmirdik ki, qızılın taleyi həmin görüşə qalsın”.    

“Qarabağ”ın kapitanı ölkə kubokunun finalında “Neftçi”yə qarşı keçirəcəkləri görüşdən söz açıb: “Neftçi” bu mövsüm çempionatda istədiyinə nail ola bilmədi. Ona görə də bütün ümidləri kubokadı. Biz final matçına yaxşı hazırlaşmalıyıq. Əlimizdən gələni edəcəyik ki, kuboku qazanaq”.