Deyan Qovedaritsa: “Azərbaycanın nəyə qadir olduğunu Xorvatiya ilə oyunda dəqiq görəcəyik”

“Ən çətin qruplardan birinə düşmüşük. Qrupda yer alan bütün komandalar yaxşıdır”. Futbolxeber.az saytına verdiyi açıqlamada bu sözləri Serbiyanın U-17 komandasının baş məşqçisi Deyan Qovedaritsa deyib.

Bakıda 17 yaşadək futbolçulardan ibarət milli komandalar arasında Avropa çempionatının elit-raundunun ilk turunda bu gün Serbiya millisi Portuqaliya ilə qolsuz bərabərliyə razılaşıb. Qovedarista görüşü belə şərh edib: “Bu gün oyun çətin alındı Hər iki komanda qələbə qazanmaq istəyirdi. Hər iki tərəfin də şansları oldu. 1 xal qazandıq. İndi artıq növbəti oyunlar barədə düşünməliyik”.

Serb mütəxəssis milli komandamız haqda da fikirlərini bölüşüb: “Azərbaycan millisi yaxşı komandadır. Heyətlərində sürətli oyunçuları var. Bir neçə oyunlarına baxmışam. Bilirəm ki, bir futbolçu Moskva ÇSKA-sında oynayır. Azərbaycanın nəyə qadir olduğunu bu gün Xorvatiya ilə oyunda dəqiq görəcəyik”.