FİFA referisi hakimlikdən getdi

Elçin Məmmədov öz xahişi ilə hakimlikdən birdəfəlik uzaqlaşdırılıb. Bu haqda Qol.Az saytına Peşəkar Futbol Liqasının prezidenti Ramin Musayev məlumat verib. O bildirib ki, E.Məmmədov ötən həftə bununla bağlı AFFA Hakimlər Komitəsinin sədri Xaqani Məmmədova müraciət edib: “Xaqani Məmmədovun mənə dediyinə görə, Elçin Məmmmədov işlərinin çoxluğu səbəbindən hakimlikdən getmək qərarı verib və işdən çıxmaq haqda ərizəni ona təqdim edib”.

PFL prezidenti “Bakı”nın prezidenti Hafiz Məmmədovun istəyi ilə E.Məmmədovun hakimlikdən uzaqlaşdırılması haqda xəbərlərə də münasibət bildirib. O qeyd edib ki, bununla bağlı məlumatlar həqiqətəuyğun deyil: “Bakı” klubu tərəfindən bununla əlaqədar mənə heç bir müraciət olmayıb”.

Xatırladaq ki, E.Məmmədovun “Xəzər Lənkəran”la kubok oyunundan əvvəl “Bakı” klubundan 20 min dollar rüşvət aldığı, sonradan isə geri qaytardığı haqda məlumatlar yayılıb. Bundan sonra “Bakı”nın vitse-prezidenti  Zeynal Məmmədov E.Məmmədovun “Xəzər Lənkəran” tərəfdən rüşvət  aldığını, kubokun yarımfinalında bu komandanın xeyrinə qərarlar qəbul etdiyini bildirib.

Qeyd edək ki, həmin oyunda uduzan “Bakı” kubokun finalına çıxmayıb.

Xatırladaq ki, Elçin Məmmədov futzal üzrə FİFA referisi idi.