“Dnepr”in yarımmüdafiəçisi: “Bakıdakı stadionda yaradılan atmosfer istənilən oyunçunu motivasiya edir”

“Bilirdik ki, bizi heç də zəif olmayan komanda ilə oyun gözləyir. Rəqibin heyətində yaxşı və usta futbolçular var”. Futbolxeber.az-ın məlumatına görə, bu sözləri “Dnepr”in yarımmüdafiəçisi Brunu Qama deyib.

Ukrayna mətbuatına açıqlama verən braziliyalı futbolçu “Qarabağ”la ikinci oyuna yaxşı hazırlaşdıqlarını bildirib: “Biz qarşılaşmaya lazımı səviyyədə hazırlaşdıq. Təəssüf ki, evdə qələbə qazana bilməmişdik. Amma ikinci oyunda 3 xal qazanmaqla qrupdan çıxmaq uğrunda mübarizəyə qoşulduq”.

Qama azərbaycanlı azarkeşlərdən də söz açıb: “Stadionda yaradılan atmosfer istənilən oyunçunu motivasiya edir. Baxmayaraq ki, həmin azarkeşlər bizi yox, rəqibi dəstəkləyirdilər. İstənilən oyunçu dolu tribunalar qarşısında oynamaqdan zövq alır”.