2 məşqçi niyə "PRO"nu ala bilmədi?

Bakıda ilk dəfə təşkil olunmuş Pro kateqoriyalı məşqçi kursunu müvəffəqiyyətlə başa vurmuş mütəxəssislərə müvafiq sertifikatlar təqdim olunduğu haqda xəbər vermişdik. Kursları heç də bütün yerli mütəxəssislər müvəffəqiyyətlə başa vura bilməyiblər. Belə ki, 2 azərbaycanlı mütəxəssis - Vəli Qasımov və Vladislav Qədirov müxtəlif səbəblərdən PRO lisenziyası ala bilməyiblər.

Futbolxeber.az-ın məlumatına görə, Vəli Qasımov imtanahdan kəsilib. Nəzəriyyədən zəif olan Qasımov yekunda bunun acısını çəkib.

Vladislav Qədirovun nəzəriyyə baxımından problemi olmasa da, o "Rəvan"ın güdazına gedib. Belə ki, qaydalara əsasən PRO lisenziyasına sahib çıxmaq istəyən məşqçi 2 xarici klubunda düşərgəsində təcrübə keçməlidir. Qədirov "Rəvan"ın baş məşqçisi olarkən klub rəhbərliyi onu xarici klubların düşərgəsinə göndərəcəyini bildirib. Lakin bir müddət sonra Vladislav Qədirov baş məşqçi postundan istefaya göndərilib. Belədə Qədirov necə deyərlər, həm əli aşından olub, həm də vəli aşından.  

Əlavə edək ki, PRO lisenziyası alarkən hansı məşqçi işsizdirsə, o özü təcrübə keçmək üçün xarici klubların düşərgəsinə yollanmalıdır.