Qələbə qolumuzun müəllifi: “Rəqibimiz Portuqaliya yox, başqa komanda olsaydı...”

Şotlandiya ilə oyunda vurduğu qolla U-17 yığmamıza qələbə qazandıran Fərid Nəbiyev oyundan sonra Futbolxeber.az saytına müsahibə verib.

- Şotlandiya ilə oyun haqda nə deyə bilərsən?

- Bu oyuna ciddi hazırlamışdıq. Portuqaliya ilə məğlubiyyət bizə yaraşmadı. Həmin görüşdən sonra söz verdik ki, azarkeşlərimizi sevindirməliyik. Belçika ilə oyunda da yaxşı çıxış etdik. Lakin yekunda heç-heçəyə nail olduq. Bu gün isə qələbə qazanmağa nail olduq.

- 4 xal toplasa da, millimiz qrupda qaldı. Bu nəticəyə görə təəssüflənirsiz?

- Məncə bu nəticə də bir uğurdur. Qrupda qalsaq da, sözümüzü deyə bildik. Avropa çempionatında böyük təcrübə qazandıq.

- Demək olar ki, bəxtimiz gətirmədi?

- Bəli, belə demək olar. Çempionatdakı ilk oyunda rəqibimiz Portuqaliya yox, başqa komanda olsaydı, qrupdan çıxardıq.

- Portuqaliya ilə görüşdə stadiondakı atmosfer oyununuza nə dərəcədə təsir göstərdi?

- Stadion amili də çıxışımıza təsir göstərdi. Çünki ilk dəfə idi ki, 33 min azarkeşin qarşısında oynayırdıq. Bu da oyunumuza öz təsirini göstərdi.

- Bu gün vurduğun qolu necə təsvir edərdin?

- Topa yiyələndikdən sonra özümə inandım. Düşündüm ki, qapıya zərbə vursam, qol ola bilər. Çox şadam ki, belə də alındı.

- Demək olar ki, bu, çempionatın ən gözəl qollarından biridir?

- Bu haqda heç nə deyə bilmərəm. Əsas odur ki, vurduğum qol komandamın qələbəsinə gətirib çıxardı.

- AFFA prezidenti Rövnəq Abdullayev oyundan sonra paltardəyişmə otağında komanda ilə görüşündə nə dedi?

- Bizi qələbə münasibəti ilə təbrik etdi. Bildirdi ki, Belçika və Şotlandiya ilə oyundan razı qalıblar.  Bu qələbə onları da sevindirdi. 

"Layihə AFFA yanında Media Komitəsi tərəfindən maliyyələşdirilir"